Revista galega de historia. 

No presente número de Murguía, Revista Galega de Historia, abrimos as páxinas da sección Fontes coa transcrición e estudo de tres pergamiños inéditos de Santa Cristina de Ribas de Sil (ss. XV-XVI), de enorme interese para a comprensión histórica da Ribeira Sacra, da autoría dos medievalistas Miguel García-Fernández, do Instituto da Lingua Galega-Universidade de Santiago de Compostela, e de Ricardo Pichel, da Universidad de Alcalá. A seguir, a investigadora Susana Guitar Novo, do Consello da Cultura Galega, presenta a Biblia Kennicott en canto que tesouro bibliográfico, para pechar esta sección Pablo Sánchez Martínez, historiador e cofundador do Comité da Memoria Histórica de Celanova, coa descoberta da acta fundacional da Mocedade Galeguista de Celanova por volta de 1932.

Na sección Investigación ábrena os arqueólogos Víctor José Barbeito Pose e Julián Bustelo Abuín desenvolven unha serie de propostas para unha mellora do sector arqueolóxico galego a día de hoxe, para o prolífico historiador e docente Emilio Xosé Ínsua centrarse no Antón Villar Ponte articulista sobre Cuba. O profesor da Universidade de Vigo Oscar Diaz Fouces presenta o proceso de depuración do mestre republicano Manuel Vidal Portela e pechan a sección o guerrilleiro Francisco Martínez López, El Quico, sobre o exilio e o asilo en Francia en 1951, e a Odette Martinez-Maler, presidenta do Centre d’études et de recherches sur les migrations ibériques (CERMI), que reflecte sobre o exilio dos últimos guerrilleiros de León-Galicia (1948-1952).

No espazo dedicado á Entrevista, Miguel García-Fernández conversa con Eduardo Pardo de Guevara y Valdés, prolífico medievalista e presidente do Instituto de Estudios Gallegos Padre Sarmiento. En Lembranzas recordamos a Isaac Díaz Pardo diante do centenario da súa morte, con quen conversamos noutrora longo e tendido (véxase Murguía, Revista Galega de Historia vol. 7-8, de maio-decembro de 2005).

Na sección Museos e Arquivos percorremos o Museu de Artes e Ofícios de Belo Horizonte (Brasil) e en Lecturas Gustavo Hervella reflexiona sobre a obra Arte e escritura na Galicia medieval. Séculos VI-X, da autoría de Anselmo López Carreira, recensionando Alberto Lago Villaverde as obras A propósito da viaxe de Plácido Castro ás Illas Blasket (Irlanda, 1928), coordinado por Uxío-Breogán Diéguez Cequiel e Xulio Ríos, e Exploring Celtic Origins, obra de Barry Cunliffe e John Koch. Por último, no apartado A Rede visitamos e comentamos os espazos ONU Mulleres, o Seminário Permanente de Estudos sobre História das Mulheres e o Centro de Documentação e Arquivo Feminista Elina Guimarães.

Hai contextos de especial singularidade na historia da Humanidade. Non hai dúbida algunha que a etapa de pandemia que se abriu desde inicios de 2020 é unha delas. A irrupción da COVID-19 está a evidenciar a fraxilidade do noso modo de vida. Máis unha vez, a sociedade volve a presentar o mellor e o peor: a solidariedade e fraternidade, dunha banda, e o individualismo irresponsábel, doutra, diante do cumprimento de pautas que deberan contribuír a paliar  a crítica situación sanitaria que atravesamos (a falta dunha vacina). Firmes defensores e defensoras da ciencia, agardamos que proximamente se poida iniciar unha vacinación universal, na que non fiquen esquecidas e esquecidos aqueles que viven nos países depauperados do mundo.

Por ultimo, todo o noso recoñecemento ao persoal sanitario, de limpeza, traballadores e traballadoras do transporte, alimentación, etcétera, así como ás persoas solidarias que contribúen en comedores e fogares de acollida a que as e os máis necesitados sobrevivan diante da penuria na que se achan, diante dun contexto de crise sanitaria, mais tamén económica.

In memoriam Antonio Nores Soliño (1950-2020), arqueólogo, historiador e figura de referencia do movemento asociativo memorialístico galego e José Antonio Durán (1941-2020), magnífico investigador e prolífico historiador, pesquisadores que nos honraron coa súa amizade.

____